Today's Reflection

ആധുനിക ക്രൈസ്തവ സമൂഹത്തില്‍, പിശാച് ഉണ്ടോ എന്നു ചോദിക്കുന്നവരും, ഇല്ലെന്നു വിശ്വസിക്കുന്നവരുമായ അനേകരുണ്ട്. അവരില്‍ പല വേദശാസ്ത്ര കേസരികള്‍പോലും ഉള്‍പ്പെട്ടിരിക്കുന്നു. യേശുവിനെക്കുറിച്ച് പ്രസംഗിക്കുന്ന ഇക്കൂട്ടര്‍ക്ക് യേശുവില്‍നിന്നു മനുഷ്യനെ അകറ്റുന്ന പിശാചിന്റെ പ്രവര്‍ത്തനങ്ങളെക്കുറിച്ചോ ഒന്നും പറയുവാനില്ല. കാരണം പിശാചിനെ പ്രസംഗങ്ങള്‍കൊണ്ടോ ഉന്നത വേദശാസ്ത്ര ബിരുദങ്ങള്‍കൊണ്ടോ പുറത്താക്കുവാന്‍ കഴിയുകയില്ല. പിശാചിന് മനുഷ്യശരീരത്തില്‍ എപ്രകാരം പ്രവര്‍ത്തിക്കുവാന്‍ കഴിയുമെന്ന് കര്‍ത്താവിന്റെ അടുക്കല്‍ കൊണ്ടുവന്ന ചന്ദ്രരോഗിയായ ബാലനു നല്‍കിയ സൗഖ്യത്തില്‍നിന്നു മനസ്സിലാക്കും. ആ ബാലന്റെ ശരീരത്തെ പിശാച് (1) ഊമനാക്കി (2) ചെകിടനാക്കി (3) ബലഹീനമാക്കി വായില്‍നിന്നു നുര വരുത്തി (4) നിലത്തു വീഴ്ത്തി നുരച്ചു ഉരുട്ടി (5) പല്ലു കടിച്ചു വരണ്ടു പോകുന്ന അവസ്ഥയിലാക്കി (6) മരിച്ചവനെപ്പോലെ ആക്കിത്തീര്‍ത്തു (7) തീയിലും വെള്ളത്തിലും തള്ളിയിട്ട് ആത്മഹത്യാശ്രമം നടത്തിച്ചു (8) നിലവിളിക്കുവാന്‍ പീഡിപ്പിച്ചു (9) നിലത്തിട്ടു ഇഴച്ചു (മര്‍ക്കൊസ് 9 : 17-21). ഭൂതങ്ങളെ പുറത്താക്കുവാന്‍ യേശു അധികാരം കൊടുത്തിരുന്ന ശിഷ്യന്മാര്‍ക്ക് ആ ഭൂതത്തെ പുറത്താക്കുവാന്‍ കഴിഞ്ഞില്ല. എന്നാല്‍ 'യേശു ഭൂതത്തെ ശാസിച്ചു; അത് അവനെ വിട്ടുപോയി; ബാലന് ആ നിമിഷംമുതല്‍ സൗഖ്യം ലഭിച്ചു' (മത്തായി 17 : 18). തങ്ങള്‍ക്കു എന്തുകൊണ്ട് ആ ഭൂതത്തെ പുറത്താക്കുവാന്‍ കഴിഞ്ഞില്ല എന്നുള്ള ശിഷ്യന്മാരുടെ ചോദ്യത്തിന് ഇങ്ങനെ മനുഷ്യശരീരത്തിന്മേല്‍ ഭീകരമായി പ്രവര്‍ത്തിക്കുവാന്‍ കഴിവുള്ള പിശാചിനെ ഉപവാസത്താലും പ്രാര്‍ത്ഥനയാലുമല്ലാതെ കീഴടക്കുവാന്‍ കഴിയുകയില്ലെന്നു കര്‍ത്താവ് തന്റെ ശിഷ്യന്മാരെ പഠിപ്പിക്കുന്നു.